جب ایمانداری ایک چیلنج بن جائے

اسلام آباد کے ایک پٹرول پمپ پر میری نظر ایک بینر پر پڑی جس پر لکھا تھا: "ہم چیلنج کرتے ہیں کہ یہاں پٹرول کا ایک لیٹر واقعی پورا ایک لیٹر ہے۔"

یہ الفاظ مجھے اندر تک ہلا گئے۔ ایک لمحے کے لیے میں حیران رہ گیا کہ ہم کس مقام پر پہنچ گئے ہیں۔ کیا اب ایک لیٹر پٹرول کی قیمت وصول کرنے کے بعد گاہک کو پورا ایک لیٹر پٹرول دینا بھی ایک چیلنج بن گیا ہے؟ جو بات بالکل معمول کی ہونی چاہیے، اسے اب ایک غیر معمولی کارنامے کے طور پر پیش کیا جا رہا ہے۔

ایک لیٹر کا مطلب ایک لیٹر ہی ہونا چاہیے۔ اس کے لیے نہ تشہیر کی ضرورت ہے، نہ اعلان کی اور نہ کسی چیلنج کی۔ ایمانداری کوئی احسان نہیں جو کوئی کاروباری شخص اپنے گاہک پر کرے۔ یہ اس کی بنیادی ذمہ داری ہے۔

لیکن شاید یہ بینر ہمارے معاشرے کی ایک بہت بڑی حقیقت بیان کرتا ہے۔ ہم دھوکہ دہی، بے ایمانی اور ایک دوسرے کا حق مارنے کے اتنے عادی ہو چکے ہیں کہ اگر کوئی شخص اپنی معمول کی ذمہ داری بھی پوری کر دے تو اسے ایک بڑی خوبی سمجھا جاتا ہے۔ ہماری توقعات اتنی کم ہو چکی ہیں کہ صحیح کام کرنے والا شخص بھی ہمیں حیران کر دیتا ہے۔

یہ مسئلہ صرف پٹرول پمپوں تک محدود نہیں۔ زندگی کے تقریباً ہر شعبے میں یہی صورت حال نظر آتی ہے۔ کوئی دکاندار خالص چیز فروخت کرے، کوئی سرکاری افسر اپنا فرض ایمانداری سے ادا کرے، کوئی ٹھیکیدار پورا کام کرے یا کوئی سرکاری ملازم رشوت لینے سے انکار کر دے تو ہم اسے ایک غیر معمولی بات سمجھتے ہیں۔

آخر ہم کس قسم کا معاشرہ بنا رہے ہیں جہاں ایمانداری کی ضمانت دینا پڑتی ہے، دیانت داری کی تشہیر کرنا پڑتی ہے اور اپنا فرض ادا کرنے پر بھی تعریف کی توقع رکھی جاتی ہے؟

ایک اچھے معاشرے میں کسی شخص کو دھوکہ نہ دینے پر خراج تحسین پیش نہیں کیا جاتا۔ وہاں ایمانداری کو ایک معمول کی بات سمجھا جاتا ہے۔

شاید پاکستان کا سب سے بڑا قومی بحران وسائل کی کمی نہیں بلکہ ہمارے اندر صحیح اور غلط کی پہچان کا آہستہ آہستہ ختم ہو جانا ہے۔