تبلیغی جماعت سے التماس:  چترال نیوز اداریہ

تبلیغی جماعت کا سالانہ اجتماع چند دنوں میں منعقد ہونے والا ہے. تبلیغی اجتماع  حج کے بعد مسلمانوں کا سب سے بڑا اجتماع مانا جاتا ہے. اور جب یہ پاکستان میں منعقد ہوتا ہے تو ملک کے گوشہ گوشہ سے اعلی تعلیم یافتہ سے لیکر ان پڑھ دیہاتی لوگ تک جوق در جوق اس میں شامل ہوتے ہیں. بہت سارے لوگ تو کل  وقتی طور پر تبلیغ کی راہ میں چل پڑے ہوتے ہیں اور یہ امر تبلیغی جماعت کی ایک بڑی طاقت ہے. اللہ تعالیٰ کی راہ میں اپنی زندگیوں کو وقف کرنے والوں کی کمی  نہیں ہے اور تبلیغی جماعت اور اجتماع اس کا مظہر ہے

گذارش تبلیغی جماعت کے امرا اور ذمہ واروں سے یہ ہے کہ اس بار تبلیغی اجتماع میں درس کے دوران حقوق العباد پر خصوصی توجہ دی جایے کیونکہ مسلمان چاہے وہ پانچ وقت کا نمازی ہو’ الحاج ہو’ تبلیغی ہو’ جو بھی ہو حقوق العباد کی پاسداری میں نہایت کمزور ہے.. پوچھو تو کہتا ہے کہ یہ چھوٹے موٹے گناہ تبلیغ کرنے سے’ حج کرنے سے یا فلاں فلاں عبادت یا وظائف پڑھنے سے معاف ہو جائیں گے

ہماری التجا تبلیغی جماعت کے رہنماؤں سے یہ ہے کہ وہ مسلمانوں کو بتائیں کہ عبادات اور وظائف کی برکت سے اگر کوئی گناہ معاف ہوتے ہیں تو وہ حقوق اللہ کے مد میں سر زد کیے گئے گناہ ہوتے ہیں جبکہ قرآن پاک کے مطابق حقوق العباد کے مد میں کیے گئے گناہ الله تعالیٰ عبادات کے بدلے معاف نہیں فرماتے. اگر یہی ایک بات اس تبلیغی اجتماع میں زور دے کر سمجھایا جائے تو مسلمانوں کے موجودہ پست اخلاقیات کا کایا پلٹ سکتا ہے. اور تبلیغی جماعت وہ کچھ حاصل کرسکتا ہے جتنا شاید آج تک حاصل نہ کر سکا ہو